فهل ممكن؟

مانيش آخر حبيب عدى وزار طيفك
ولا أول حبيب طبعا
أكيد محتاج أكون مرة
ولو مرة
ومين يعلم؟
غريب والسكة مقطوعة
وكل الهم في عمري
غريب
ويّا الألم والحسرة من سكة فشل رابحة 
غريب ف خريطة مش واضحة
بترسمها حدود وبلاد
طلاسمها حياة كاملة
وشفرتها في بطن الحوت
ويوم ما جيت انا بشوقي
على بابك
لقيت الصد فوق كتفي
جبال
وانا مش قدها بضعفي
ورحلة عمري دحديرة
يمين ف شمال.
فهل ممكن؟
تفكي طلسمي بإيدك؟
وبطن الحوت ده يلفظني بتوحيدك؟
وأصبح يوسف التاني 
عناقيده تكون قمحك 
قميصه بس يتقطع فدا ملامحك
وأحلامه وتفسيرها
خريطة بالأمل تنضح لحد لقاه مع أمره
يكون طيفك شعاع مغزول ف توب عمره

وهل ممكن
أكون أيوبك الصابر
سنينه الضر عداها
ومستحملها واهو صابر
وبيحبك بكل ما فيه وبيقولها ولا يكابر
فتبتسمي
تدوب أوجاعه بالنظرة اللي ف عينيكي
يشمك ريحة الجنة
فيتمنى
تسافر روحه في بحرك فيشفى فيه
وقبل اللجة والغرقة ايدين تحميه
فهل ممكن؟.............
.........

عن موضوع الفول واللحمة

بمناسبة الكفتة, الناس ركزت على موضوع صواريخ الظافر والقاهر كمقاربة ونسيت قصة الفول واللحمة لعمنا أحمد فؤاد نجم, مع إن المقاربة فيها أوقع :)

عن موضوع الفول واللحمة صرح مصدر مش مسؤول
ان الطب اتقدم جدا والدكتور محسن بيقول
ان الشعب المصري خصوصا من مصلحته يقرقش فول
حيث الفول المصري عموما يجعل من بني ادم غول
تأكل فخده في ربع زكيبه والدكتور محسن مسؤول
يديك طاقة وقوة عجيبة تسمن جدا تبقى مهول
ثم اضاف الدكتور محسن ان اللحمه دي سم أكيد
بتزود أوجاع المعدة وتعود على طولة الايد
وتنيم بني ادم دايما وتفرقع منه المواعيد
واللي بياكلوا اللحمة عموما حيخشوا جهنم تأبيد
يادكتور محسن يا مزقلط يامصدر يا غير مسؤول
حيث ان انتو عقول العالم والعالم محتاج لعقول
مارأى جنابك وجنابهم فيه واحد مجنون بيقول:
احنا سيبونا نموت باللحمة وانتو تعيشوا وتاكلوا الفول
مارأيك ياكابتن محسن مش بالذمة كلام معقول

حرامية مصر

محمد على الضابط الألبانى في الجيش العثماني كان مدعو على حفلة ووليمة فى القنصلية الفرنسية في مصر,  وأثناء الحفلة اكتشف الخدم اختفاء الشوك والسكاكين الفضة, وأبلغوا القنصل العام ماتيو ديليسبس قنصل فرنسا فى مصر (أبو فرديناند ديليسبس اللي أخد امتياز حفر قناة السويس من سعيد ابن محمد علي) المهم اقترح البعض إنه يحصل تفتيش للحضور, وكان الوحيد اللي اعترض هو محمد علي وثارته ثائرته, محمد علي طبعا كان لابس سروال واسع من اللي كان مشهور بيهم أفراد الجيش العثماني وقتها. لكن ماتيو ديليسبس رفض تفتيش الحضور بحجة إن كل ضيوفه ناس محترمين وفوق مستوى الشبهات.

المهم دار الزمن دورة كبيرة وتوفى شاه إيران رضا ميرزا الشهير برضا بهلوي بعد خلعه من قبل الإنجليز والروس وتولية ابنه محمد مكانه بسبب تعاونه مع الألمان أثناء الحرب العالمية ونفوه لجنوب أفريقيا, وطبعا رفض الأنجليز والروس دفنه في إيران فتم اقتراح دفنه مؤقتا في مصر في مسجد الرفاعي بالقاهرة, ووضعت زوجته في التابوت سيف دهب مرصع بالجواهر كان الشاه بيعتز بيه لأنه انتقاه من مقتنيات آخر شاه من أسرة القاجار اللي خلعه ونصب نفسه مكانه شاه على إيران. السيف حلي في عنين فاروق فاستولى عليه, بعدها لما الحرب خلصت والجثمان رجع إيران عشان يتدفن فيها اكتشفت أم محمد رضا بهلوي وزوجة الشاه السابق اختفاء السيف, وكانت بتعاير هي والأميرة أشرف أخت محمد رضا بهلوي الأميرة فوزية أخت فاروق وزوجة الشاه بأنهم: صحيح ملهمش جذور عريقة زي أسرة محمد علي, بس هما مش حرامية زيهم, وده كان سبب رئيسي في طلاق فوزية من الشاه.

دار الزمن مرة تانية ووصلنا لأكبر حرامي في تاريخ مصر هو وأسرته وحاشيته اللي نهبوا مصر وأفرغوا خزانتها وباعوا ثرواتها ومصانعها ومواردها ببلاش وللعدو قبل الصديق لحد ما بقت بتشحت وتمد إيدها لطوب الأرض. السرقة وخفة اليد لأسرة محمد علي مكنتش بتوصل للمدى الصعب اللي عملته أسرة مبارك وأعوانها  -اللهم باستثناء إسماعيل بسفهه وبذخه وإهداره لموارد مصر- بس المهم في النهاية إن مصر دايما حظها وحش وواقعه في حرامية ناهبينها وجايبنها ورا.

خارج الإديلوجية- مراجعة شخصية للتوجه.

#تحولاتي_الفكرية_الأخيرة 

بقيت لا أصنف نفسي بمنطق ايدلوجي دلوقتي..وده بفضل تجربتي الشخصية داخل الأحزاب المسماه إسلامية بعد الثورة. تجربة بمجملها اثبتت انها مقدمتش جديد .. يعني قعدنا نردد كلام المسيري عن الحوسلة والنموذج المادي اللي بيستغل الانسان وحوله لمادة استعمالية واننا لازم نخلق نموذج مغاير. وفي النهاية التجربة العملية تم استيعابها داخل اطار النموذج اللي كنا بننتقده وشايفينه غلط! 

وبقه التمترس خلف اسم تيار اسلامي (حتى لو كان التيار نفسه بممارساته مخالف للمنظومة المعرفية اللي بندعو ليها وبالتالي لا يصح تصنيفه ضمن النموذج اللي بنسعى ليه) الممارسة اثبتت أننا داخل النموذج المادي مش متجاوزين له وسقط الجميع في فخ الوقوف تحت الشعار اكتر من السعي لتحقيقه، فتحولنا لاستخدام الاسلام اكتر ما الهدف كان توخى مقاصده. وحتى الوسط اللي كنت عضو مؤسس فيه ومرشحه في انتخابات مجلس الشعب وقضيت فيه فترة مهمة في حياتي..الوسط اللي اقترح تصور وآلية , ثبت إنها مصمدتش قدام التجربة العملية, وسرعان ما تخلى عنها أمام ضغط الظروف وتلبسته حالة الصراع وأدواته.  فأصبح لزاما عندي ابعد الاسلام عن الخصومة عشان مكرهش الناس في دين الله واخلي الغاية ادنى مرتبة والخلاف فيها مش فاصل ولا نهائي.

 بقة القضية بالنسبة لي شخصيا برة الايدلوجية وصراعها..متجاوزة بمعنى ما، يمكن مش تجاوز كلي بس في حدود مسموح فيها الخلاف والاتفاق بدون صراع. القضية عندي دلوقتي برنامج يحقق للناس حدود معينة من العدل الاجتماعي والكرامة والحرية ف اختياراتهم وافعالهم وتفضيلاتهم على ارضية متفق عليها انها متصطدمش بعقائد الناس او مقدساتهم او اعرافهم..وبالتالي يدخل ف الحيز ده اي حزب او جماعة داخل المجال العام اللي بنعيش فيه طالما لم يعلن صراحة إنه ضد الدين ومستوعب دوره كحاضنة وموروث وهوية لمجتمعاتنا لو غابت منبقاش إحنا إحنا, نبقى أي حد تاني.

في الغربة

الغربة مش حرية
الغربة جايز براح
مسعكش في وطنك
مكتوب عليك الرحيل
ف الدنيا اللي وسعت للغريب. 
مفروض عليك الغياب
والغير بيمضي حضور
مفروض عليك لتلف بعنيك الحزينة
ف وش خلق الله.
وتدق بأديك التعيسة 
ف وسط أهات الوجع..
ميت ألف سكة وألف باب
والخلق ليك شاهدين
بس الأكادة إنها واسعة
مادة الإيدين واسعة
فاتحة درعتها..
بتنحني.
لايقة عليها المسألة؟؟
واللا عشان الظرف طارىء
بتطاطي للموجة؟
والمعضلة..
ان انت اكتر حد
شال الشيلة مقالش اه.
وأن انت اكتر حد
قالها مكنش ساكت.
"ملعون أبوك يا وطن...
لو تنحني راسك"