الأحد، 3 يناير، 2010

على وتر الفراق(ضفيرة)

حبيبتى.....
فاصلة منقوطة!!
وشرطة من وراها فراغ!!!
وكلمة حب ملغية
وكلمة وهم مقرية
ومنسية
وساقطة من كتاب قلبى
وقلت أحاول أتهجى
حروف الأسم تاه منى
وقمت وقلت أتوضى
واصلى الفجر إكمنى
بدعوة ربنا أقدر
ألاقى صورتها فى الننى
لكن ملقتش غير دمعة وحسرة تنكتب عنى!!!!!.
لأنى.......
لأنى جئت للدنيا
طريدا أبتغى وطنا
لأن الحب أعرفه
ذبيحا يرتدى كفنا
مررت بإصبعٍ فى الوهم
ثم رسمت أشلاءَ
قد استسقيت يا ربى
سقانى الهم ما شاء
ورحت أريد رؤيتها
أراودها بآمالي
وعند النظرة الأولى
سقطت أجر أذيالي.
وديلى....
بالمنى شابك
ف قصة حب لم تكمل
سألت القلب ليه دايب
جاوبنى ....وانت ليه بتسأل؟!!!
معدش العمر فيه باقى
معدش كلام ورد وقول
وشاطر تكتب الكلمة
وتمحيها أوام على طول؟!!
وشاطر ترسم البسمةعشان الناس تقول فرحان؟!!
تلون بالأمل عمرك
وتغرس فرشتك تلقى
معدش ف فرشتك ألوان!!!!.
وفى الإمكان...سلامٌ لست أرجوه
لوجهٍ عابسٍ أبدا
على كتفيّ أحمالٌ
هويت صريعها كمدا
ينوء بحملها جسدى
وليس البحر لى مددا
لأن الحب فى الدنيا
يمد الخطو يرديني
وشعري محض تزويرٍ
وإن كان الهوى ديني
صراطى لست أعرفه
فمن للحق يهديني؟.
ويهدينى....
حمام الغية أحلام السفر تانى
أتوه فى الدنيا بعنيه
ولسه الحب ما جانى
أتوه من غير ما كون مذنب
ولا أقدر أكون جانى!!!
عرفتى اذاى يا أحلامى
تموتى ف صدرى وف دمعى
وتخدى ف حضنك الأشواق
تلفيها بتوب وجعى!!!
معدش كلام يقول موال
معدش حبيب إليه اشتاق
واصلى الفجر ليه وادعى؟!!!!.

هناك تعليقان (2):

  1. اللــه بجد
    وبــس
    (:

    ردحذف
  2. شكرا يا ميرام
    على الإطراء
    بس بنحاول نعمل ذى الجماعة
    المدونين الجامدين اللى هما عرفين نفسهم
    سعيد بمرورك

    ردحذف

اكتب