الجمعة، 10 يونيو، 2011

ألف عجاف



و..... بحلم
زي ما يرسم خيالي صورة أعشقها 
ففوق لحظة
وأرجع اخاف!!!
وبحلم
قد ما جوايا من وجعي
بقول الآه
وانا يوسف....
بألف عجاف !!!
ومين يقدر على حلمي؟!!!
يفسر إن انا مضروب
بداء العشق.
يأوّل فيه
يبص -كأنه م الحُكما- على وشّي
وبعد النظرة والتانية
وتنهيدة...
تشق القلب ميت حتة
فيتحطم مع صخرة (سزيف) عشقي 
وتيجي (إيزيس)
عشان تجمع فُتات النفس
تتبسم
وتتوكل على ربي
وتدفن قلب كان أخضر 
ولا اسودش
لكن حمله كمثل جبال
وكان شيّال
وكان صابر
وكان -م العند- بيكابر  
لكن يا خسارة
يا خسارة
طلع في الحلم كان صاحي
وكان فايق
وكان موجوع
لأن الوهم كان ضلّه
وكان شفّاف 
بألف وألف ألف عجاف.

هناك تعليقان (2):

  1. رائعة جدا

    اسمحلى أشاركك بحاجة كبتها قبل كدة بعتقد أن فيها نفس الروح ، وإن كانت اقل طبعا فى المستوى الأدبى لأنى، كتباها من زمااااااااااااان

    اسمها : اغتيال مارد

    شارد ...
    وبارد ...
    وجوايا مارد ...
    رافض حاجات.
    رافض فشل ...
    رافض كسل ...
    رافض يدوق حتى العسل ...
    لو مش بجهده واحسانات.
    عايز يموت ...
    عايز يفوت ...
    عايز يقطع ورق التوت ...
    ويعدى أرض الخيالات.
    وحده ...
    وواخده ...
    فكره برقة لحد لحده ...
    ومحدش مانعه من الممات.
    وقلبه ...
    خلبه ...
    كل حب الدنيا جلبه ...
    وعقله قاله دى خرافات.
    يأس ...
    وحبس ...
    كل حياته جوة قفص ...
    وبريشة رسم ابتسامات.
    هارب ...
    وبيحارب ...
    وبيحسب الموت م المآرب ...
    لأن فى الموت حياة المثاليات.
    قاسى ...
    وناسى ...
    إنى بعيد عن المراسي ...
    وتايه وفاقد الأتجاهات.
    طالب كتير ...
    وأنا فقير ...
    وخايف من بئس المصير ...
    لو قلت اعمل نفسى فارس لحكايات.
    هاغتال ...
    وانهال ...
    ع المارد بكل أدوات القتال ...
    لحد مايبقى أجبن كل المخلوقات.
    وهبقى بارد ...
    وهبقى شارد ...
    ومفيش جوايا مارد ...
    زى أى انسان عاى عاش ومات.

    ردحذف
  2. candy
    (:
    منورة دايماً (:
    وشكرا للإطراء.
    أما عن قصيدتك فأنت قلتي إنك كتبتيها زمان
    وأنا ملاحظ إن فيها هنات عروضية كتييير
    وبعض -أعذريني- سذاجة من يعتقد إن الشعر قافية فقط
    معرفش البدايات دي إتطورت واللا اكتفيت بكتابة القصة؟ لأن أنا شايف إن مستواك في القصة عبقري
    ويستحق الوقوف عنده طويلاااااا طويلاااااا

    تحياتي (:

    ردحذف

اكتب