الخميس، 23 يونيو 2011

طبيخ




مكنتش أتخيل في يوم من الأيام إني هتجرأ وأتطاول واطبخ
كده بكل بساطة..أنا اللى طول عمري مبعرفش أقلي بيض
يمكن أعرف أسلقه وممكن معرفش كمان
يمكن اعتمادي على كتيبة من إخواتي البنات خلاني لا أجيد أي عمل من أعمال المنزل
ويمكن كسلي هو اللى خلاني كده...جايز؟!
لكن المفأجة إني تجرأت وطبخت لما اشتغلت في بورسعيد
الأول كنت مقضيها تيك أواي في الشغل والشقة والشارع
وبعدين بطني وجعتني فقلت أجرب أعمل حاجات خفيفة كده
زي الرز والمعكرونة
لكن بعد شوية حبيت أطبخ خضار
فاعتمدت على أمي إنها تديني برطمان بصل نص سوا
وبعدين العملية بقت في النملية وقلت يا واد ما تقلي إنت وتخرط البصل
صحيح الدموع إنهمرت كالشلال من كل اتجاه
بس فعلتها...فعلتها
على طريقة وجدتها..وجدتها بتاعة الحج الله يستره أرشميدس
بالمناسبة كانوا زمايلي في المدرسة الثانوي مسميني أرشميدس معرفش ليه؟؟
يمكن كانوا فاكرين إني في يوم من الأيام هفعلها وأتجرأ وأطبخ..جايز؟؟!!
ويمكن لأني باستخدم إيدي الشمال في الكتابة؟!!برضو جايز؟!!!
طبعا الطبيخ مقولكوش على حلوته وطعامته
حاجة كده يعني مينفعش أوصفها غير بكلمة....
(يــــــــــــــــــــــــــــــع)
أيون....هو ده الوصف المثالي
بس برضو كلته, مطبقا المثل الشهير (وجع البطن ولا كب الطبيخ)
مين العبقري اللى اخترع المثل الفظيع ده؟!!
أكيد واحد كان جعان ومش لاقي ياكل
المهم بقة أنا دلوقتي بعرف أعمل رز (شوية)
وبعرف أعمل مكرونة (حبتين)
وبعرف أطبخ خضار (تلت حبات)
والأهم إن الأكل ده كله بتجيني الجرأة وأكله
.
.
.
وأنا مروح لأمي النهاردة أكل من إيديها بقة
ياه حاجة جامدة جدا أكل الأم ده (: (:


هناك 6 تعليقات:

  1. الطبخ دا أصعب من السحر

    والمشكلة بقى لما يبقى واحدة عندها أخوات أولاد بيحبوا الطبخ جدا كهواية

    يبقى قضى عليها :))

    برافو ... وأهى الحاجة أم الاختراع ، أكيد هايجيلى يوم.

    ردحذف
  2. candy
    إوعي تكوني مبتعرفيش تطبخي؟!
    تبقى مصيبة
    البنت اللى مبتعرفش تطبخ زي الحلة من غير غطا بالظبط (:

    ردحذف
  3. ربنا يسامحك

    أنا حلة من غير غطا ؟؟

    ;P

    ردحذف
  4. ههههههه أيوة كداا محدش بيعرف قيمة أخواته البنات والست الوالدة ف موضوع الطبيخ الإ لما بيجرب هو ههههه ..بس الطبيخ مش سهل ع فكرة هو نفس يعني ممكن الواحد يكون معاه المقادير وبردو مش يطلع الأكل حلو عشان كداا تعرف الواحدة كويسة ف الطبيخ من تقديرهاا للأكل وممكن شوية ملح قليلة أوووي تدمر العملية وتخلي الأكل ماسخ أو حتي تخلي الأكل محدق اوووي ولازم نرميه .....وربنا يخلي الست الوالدة ...واكل سعيد لحضرتك ...

    ردحذف
  5. candy

    يبقى فعلا مبتعرفيش تطبخي (:
    لا لازم تتعلمي بسرعة لحسن العرسان لو عرفوا الموضوع ده كلهم هيهربوا D:
    وبعدين متزعليش يا ستي إنتى حلة بغطا استانلس كمان (:

    ردحذف
  6. ياسمين
    (:
    واضح إنك طباخة ماهرة
    فعلا الطبيخ نفس...بس أنا اللي بطبخوه بكله مضطر للأسف وربنا يجازيني خير بقة على بلوتي

    نورتي المدونة (:
    تحياتي

    ردحذف

اكتب